डेङ्गु ल्वय् पाखें सचेत जुइत इनाप
ताल्लाया ई न्ह्यःने वयेवं चिकित्सकतय्सं डेङ्गु ल्वय्पाखें इलय् हे सचेत जुइत इनाप याःगु दु । चितवन मेडिकल कलेजं थौं येँय् छगू पत्रकार सम्मेलनया ग्वसाः ग्वयाः पत्तिं न्यानाः जुइगु डेङ्गुबारे इलय् हे सचेत मजूसा वंगु दँया स्वयाः नं ग्यानापूगु स्थिति पिज्वयेफूगु ख्याच्वः ब्यूगु दु ।
पत्रकार सम्मेलनय् चितवन मेडिकल कलेजया डा. शीतल अधिकारीं थुगु दँय् उगु ल्वय्या नितिं राज्ययापाखें आःतक्क छु नं ज्या मजूनिगु धयादिसें याकनं ल्वय्या नितिं माःगु थासय् उपयुक्त श्रोत व साधनया व्यवस्था यायेत इनाप यानादीगु दु ।
वय्कलं पत्तिं न्यानाः हे ल्वय् पुनीगु जूगुलिं थुकियात नष्ट यायेगु अभियानय् राज्य लिसे सर्वसाधारण छधी जुयाः न्ह्यःज्यायेमाःगु खँय् ब: बियादिल । नेपालय् थुगु दँ न्यनावःगु भाइरस छु प्रजातिया खः धकाः आःतक्क नं पुष्टि मजूगु डा. अधिकारीं जानकारी बियादिल ।
डेङ्गु भाइरसया प्यंगू प्रजातित दु । तच्वयेक वइगु ल्वय्, छ्यंया नसा स्याइगु लिसे मांसपेशी स्याइगु, मिखाया ल्यूनेया ब्व स्याइगु थेंज्याःगु थ्व ल्वय्या लक्षण खः । सन् २००४ सं नेपालय् न्हापांगु खुसिइ चितवनय् लुयावःगु डेङ्गु ल्वचं सन् २००६ सं महामारीया रुप काःगु खः ।
