संविधान मवइगु खनाः राष्ट्रपतिया चिउताः

येँ (सन्ध्या टाइम्स)/राष्ट्रपति डा. रामवरण यादवं न्हूगु संविधान च्वयेगु ज्या झन झन लिबाना वनाच्वंगु खँय् चिन्ता प्वंकादीगु दु।वय्कलं थ्वहे झ्वलय् आः वइगु जेष्ठ १४ गतेया दुने न्हूगु संविधान जारी याये मफुत धाःसा छु जुइ धकाः जिम्मेवार मनूतय्त नापलानाः सहलह ब्याकेगु शुरु यानादीगु दु। दलतय्गु दथुइ कचमच जुयाच्वंगुलिं इलय् हे संविधान जारी मफइगु अवस्था वयाच्वंगु तायेकाः वय्कलं मनूत नापलायेगु यानाहःगु खः। क्वःछिनातःगु ई कथं न्हूगु संविधान जारी यायेगु थ्यंमथ्यं निला जक ई ल्यं दनिगु इलय् राष्ट्रपति चिन्तित जुयाः प्रधानमन्त्री झलनाथ खनाल नापं सभामुख सुवासचन्द्र नेम्वाङयात न्यनादीगु दु। वय्कलं म्हिगः प्रधानमन्त्री खनालयात नापलानाः सहलह ब्यकादीगु खः। प्रधानमन्त्रीलिसे भेटवार्ताया झ्वलय् राष्ट्रिय सहमतिया ज्या गन थ्यनाच्वन धकाः न्ह्यसः तयादीगु खःसा प्रधानमन्त्री खनालं उकिया नितिं कुतः यानाच्वनागु जानकारी बियादीगु खः ।

अथे हे थौं सभामुख नेम्वाङयात नापलानाः नं न्हूगु संविधान इलय् हे जारी मजुल धाःसा छु जुइ धकाः न्ह्यसः तयादीगु सीदुगु दु। राष्ट्रपति निवास सितलनिवासय् थौं सुथय् जूगु भेटवार्ताय् वय्कलं थ्व न्ह्यसः तयादीगु खः। उगु भेटवार्ताय् सभामुखं संविधानसभाया संवैधानिक समिति अन्तर्गत दयेकूगु उपसमितिं न्हूगु संविधान निर्माणया सवालय् जुयाच्वंगु विवाद ज्यंकेगु ज्या याःगु नापं आः ल्यं दनिगु ज्याया बारे जानकारी बियादीगु खः। सभामुख नेम्वाङं धयादिल, 'राष्ट्रपतिजुं आःया अवस्थाय् शान्ति प्रक्रिया गन थ्यनाच्वन? अले संविधान निर्माण प्रक्रियाया बारे चिउताः तयादीगु खः ।'

राष्ट्रपति यादवं अथे मनूतय्त नापलानाः न्हूगु संविधानया बारे चिउताः तयेगु ज्या याना हःगुलिं छखे सरकार व दलतय्त दवाव ब्वलनीगु सम्भावना अप्वया वःगु दुसा मेखे स्वयं राष्ट्रपति हे सक्रिय जुयाः वइगु जकं मखु ला धकाः मनूतय्सं न्ह्यसः तकं तयाहःगु दु ।