न्हय्गू बुँदे सहमति खारेज मजुइकं कांग्रेसं सरकारय् ब्वति मकाइगु
नेपाली कांग्रेसया नेतातय्सं एकीकृत नेकपा (माओवादी) व नेकपा (एमाले) दथुइ जूगु न्हय्गू बुँदे सहमति खारेज मजूत्तले सरकारय् ब्वति मकायेगु जानकारी ब्यूगु दु । पुलांम्ह सभापति गिरिजाप्रसाद कोइराला मदुगु दच्छि क्यंगु झ्वलय् थौं कांग्रेसं ग्वसाः ग्वःगु देय्व्यापी ज्याझ्वःया झ्वलय् थीथी जिल्लाय् थ्यंपिं कांग्रेस नेतातय्सं थज्याःगु बिचाः प्वंकूगु खः ।
विराटनगर विमानस्थलय् पत्रकारपिंलिसेया नापलाये ज्याय् सभापति सुशिल कोइरालां माओवादी व एमालें न्हय्गू बुँदे सहमति लित कयाः हाकनं नेपाली कांग्रेसलिसे सहमति कायम याःसा जक सरकारय् ब्वति कायेगुबारे बिचाः यायेफइगु धयादीगु दु ।
अथेहे चितवनय् ग्वसाः ग्वःगु छगू ज्याझ्वलय् संसदीय दलया नेता रामचन्द्र पौडेलं न्हय्गू बुँदे सहमति देय्या नितिं दकले तःधंगु धोका जूगु धयादिसें उगु सहमति खारेज यायेत माग यानादिल । वय्कलं सहमतिं लोकतन्त्र व शान्ति प्रक्रिया हे समस्याय् लाकूगु दाबी नापं यानादिल ।
कोइरालाया दच्छिया तिथिइ थौं न्हय्न्यागुलिं जिल्लाय् कांग्रेसं थीथी ज्याझ्वःया ग्वसाःग्वःगु ख: । नेपाली कांग्रेसया तत्कालीन सभापति कोइराला वंगु दँ चैत्र ७ गते म्ह्याय् सुजाता कोइरालाया निवास मण्डिखाटारय् ८७दँ बैंशय् मदुगु खः ।
