गृहमन्त्रालय थःम्हं हे तयाः राज्यमन्त्री मेपिंत बिइगु प्रमया तयारी
प्रधानमन्त्री झलनाथ खनालं थ्वहे वाःदुने सरकारयात पूर्णता बिइगु तयारी यानादीगु दु । पार्टीपाखें मन्त्री जुइपिनि नां क्वछीधुंकाः सरकारयात पूर्णता बिइगु तयारीइ प्रधानमन्त्री जुयादीगु जानकारी वय्कःया निकटवर्तीं ब्यूगु दु । प्रधानमन्त्री खनालं आःया मन्त्रीपरिषद् विस्तारय् नापं गृहमन्त्रालय थःम्हं हे तयाः पार्टीया सुं नेतायात राज्यमन्त्री दयेकेगु सम्भावना दुगु स्रोतं जानकारी ब्यूगु दु ।
सरकारयात पूर्णता बिइगु विषयसं एमाले नायः नापं जुयाच्वनादीम्ह प्रधानमन्त्री झलनाथ खनालं थौं मधेशी जनअधिकार फोरम नेपालया नायः उपेन्द्र यादवलिसे सहलह यानादीगु दु । प्रधानमन्त्रीलिसेया सहलह सकारात्मक जूगु फोरम नेपालया नेता लिसे वार्ता पुचःया कजि रामसहाय प्रसाद यादवं जानकारी बियादीगु दु ।
प्रधानमन्त्रीं कन्हय् एकीकृत नेकपा (माओवादी)लिसे नं सहलहया तयारी याःगु दु । प्रधानमन्त्री खनालं सरकारय् ब्वति काइपिंसं मेगु नांधलः लःल्हायेत माओवादीयात इनाप नापं याःगु दु । गुलिखय् नेतापिं जिल्लापिने दुगुलिं वय्कःपिं येँय् लिहाँवयेधुंकाः बैठक च्वनाः मेपिं मन्त्रीपिं क्वःछीगु माओवादी नेतातय्सं जानकारी ब्यूगु दु ।
