नेवाः लागा सुरक्षा यायेत च्यागू नेवाः पुचःया माग
नेवाः हक हितया निंतिं सकि्रय च्यागू नेवाः खलः पुचःतय्सं थन छगू मंकाः वक्तव्य पित बिसें संघीय नेपाःया प्रान्त विभाजन जातीय भाषिक व क्षेत्रीय लिधंसाय् जुइमाः धासें नेवाःतय् हकय् नेपालमण्डल नेवाः स्वायत्त प्रान्त जुइमाः धकाः माग याःगु दु । मंकाः वक्तव्यय् स्वनिगःयात छगू हे शहरया रुपय् विकास यायेगु धकाः सरकारं हयेत्यंगु विधेयकया विरोध यासें यदि अज्याःगु कानून वल धाःसा स्वनिगलय् पिनेयापिं मनूत यक्व दुहां वयाः थन नेवाःतय्त हे अल्पमतय् लाकीगु खतरा दु धकाः नं न्ह्यथनातःगु दु । थ्व विधेयकं नेवाः लागायात केन्द्र शासित लागा दयेकेगु कुतः जुयाच्वंगु प्रस्ट सी दु धासें वक्तव्यय् उकिया विरोध यायेत नं इनाप यानातःगु दु । अथे हे स्वनिगलय् आदिवासी नेवाःतय् स्वीकृति मकासे छुं नं कथंया भौतिक निर्माण याये दइ मखु धासें वक्तव्यय् नेपाःगाः दुने अप्वयाच्वंगु आप्रवासन तुरुन्त नियन्त्रण यायेत नं माग यानातःगु दु ।
वक्तव्यय् नेवाः देय् दबू, नेवाः जागरण मंच, नेवाः देय् गुथि, ज्यापु महागुथि, नेवाः राष्ट्रिय मुक्ति मोर्चा, नेपाः लोकतान्त्रिक नेवाः संघ, नेवाः राष्ट्रिय आन्दोलन गुथि व नेवाः राष्ट्रिय ल्याय्म्ह न्ह्यलुवाःया प्रतिनिधितय्सं हस्ताक्षर यानातःगु दु ।
