मौकाया सदुपयोग यानाः कांग्रेस सरकारय् वनेमाः : कोइराला
नेपाली कांग्रेसया नेतृ सुजाता कोइरालां माओवादी सरकारय् दुगु उपयुक्त मौकाय् कांग्रेस नं उकि ब्वति कयाः सरकारयात राष्ट्रिय सहमतिया सरकार दयेकेमाःगु खँ धयादीगु दु ।
रिपोटर्स क्लब थौं येँय् याःगु छगू साक्षात्कार ज्याझ्वलय् नेतृ कोइरालां सरकारय् वंसाः शान्ति प्रक्रिया निष्कर्षय् थ्यनीगु व मेगू समस्या समाधान जुइसाः कांग्रेस सरकारय् वनेमाःगु खँय् बः बियादिल ।
वय्कलं थः कांग्रेस पार्टी दुने निर्णय यायेगु थासय् मदुसां थःम्ह कांग्रेसयात सरकारय् यंकेगु निंतिं पहल यायेगु धयादिल । माओवादी प्रजातान्त्रिक धारय् वयेधुंकूगु दावी यानादिसें वय्कलं आः राजनीतिक धुर्वीकरण यानाच्वनीगु ई मखुगु टिप्पणी यानादिल ।
ज्याझ्वलय् पर्यटन तथा नागरिक उड्ययन मन्त्री खड्गबहादुर विश्वकर्मा व एमाले नेता प्रदीप ज्ञवालीं कांग्रेस सरकारय् वःसा न्हय्गू बुँदे सहमति परिमार्जन वा न्हूगु सहमति यायेफइगु धयादिल । तर वय्कःपिंसं न्हय्गू बुँदे सहमति खारेज याये धाःसा मफइगु स्पष्ट यानादिल ।
