गिरिजाया झ्वाता शिलन्यास ज्याझ्वलय् अवरोध

येँया महाराजगञ्ज स्थित शंकपार्कय् दयेकेत्यंगु पुलाम्ह प्रधानमन्त्री नापं नेपाली कांग्रेसया पुलाम्ह सभापति गिरिजाप्रसाद कोइरालाया झ्वाता शिलन्यास ज्याझ्वलय् स्थानीयवासीतय्सं अवरोध थंगु दु ।

गिरिजाप्रसाद मदुगु दच्छिया पुण्यतिथि लाकाः शंकपार्कय् श्रद्धाञ्जली सभा यानाः शिलन्यास यायेत्यंगु ज्याझ्वलय् स्थानीयवासीतय्सं नेता विशेषया शालिक दयेके मबीगु व सुंनं नेताया नांमं उगु थाय् नामाकरण याकेमबीगु धासें अवरोध याःगु खः ।

कांग्रेसं उगु थासय् मदुम्ह कोइरालाया झ्वाता दयेकेधुंकाः 'गिरिजाप्रसाद कोइराला शान्ति पार्क' नामाकरण यायेगु योजना दयेकातःगु खः । स्थानीयवासीया अवरोध लिपा कांग्रेस कार्यकर्तातय्सं अन श्रद्धाञ्जली सभा जक यानाः लिहांवंगु खः ।