भारत न्हूगु जनादेशया पक्षय् : गच्छदार
मधेशी जनअधिकार फोरम (लोकतान्त्रिक)या नायः विजयकुमार गच्छदारं इलय् हे संविधान निर्माण मजूसाः न्हूगु जनादेशय् वनेमाःगु पक्षय् भारत दुगु दावी यानादीगु दु ।
भारतया प्यन्हुयंकया भ्रमण क्वचायेकाः थौं येँय् लिहांझायादीम्ह गच्छदारं आः वइगु जेठ १४ गतेया दुने नं न्हूगु संविधान निर्माण यायेगु ज्या क्वमचासाः हानं ई तनेमज्यूगु बिचाः भारतीय नेतातय्सं प्वंकूगु धयादिल ।
वय्कलं भारत संविधान निर्माण स्वयां न्ह्यः हे शान्ति प्रक्रिया क्वचायेकेमाःगु पक्षय् दुगु धयादिसें जेठ १४ दुने संविधान निर्माण मजूसाः न्हूगु जनादेशया निंतिं वनेत भारतीय नेतातय्सं सुझाव ब्यूगु धयादिल ।
भारतीय नेतात लिसे नेपाःया बारे सहलह यायेत धासें प्यन्हु न्ह्यः गच्छदार नापं तराई मधेश लोकतान्त्रिक पार्टीया नायः महन्त ठाकुर व सद्भावना पार्टीया अध्यक्ष रजेन्द्र महत्तो भारत भ्रमणय् वंगु खः ।
भारतय् स्वम्ह नेतातय्सं भारतीय विदेश मन्त्री एसएम कृष्णा, अर्थमन्त्री प्रणव मुखर्जी, भारतीय विपक्ष दलया नेतृ सुष्मा स्वराज लगायत नेतात नाप खँल्हाबंला यानादीगु खः ।
