'कांग्रेस नं सरकारय् वःसा न्हूगु सहमति'
सत्ता साझेदार एनेकपा (माओवादी) व नेकपा (एमालें) यदि वर्तमान सरकारय् नेपाली कांग्रेस नं सामेल जूसाः न्हूगु सहमति यायेफइगु निर्णय या:गु दु ।
निगू तःधंगु वाम दल दथुइ थौं सिंहदरवार स्थित एमालेया संसदीय दलया ज्याकूथीइ जूगु मुँज्यां कांग्रेस सरकारय् वःसा न्हूगु सहमति यानाः वनेगु निष्कर्ष पिकाःगु खः । तर मुँज्यां निगू दल दथुइ जूगु न्हय्गू बुँदे सहमति धाःसा खारेज मयायेगु अडान काःगु दु ।
न्हय्गूगु बुँदे सहमति शान्ति व संविधानया निंतिं जूगु धासें निगू दलं खारेज यायेमफइगु धाःगु दु । उखे कांग्रेसं धाःसा न्हय्गू बुँदे सहमति खारेज मजुइकं सरकारय् ब्वति कायेगु बारे सहलह यायेमफइगु अडान कयाच्वंगु दु ।
अथेहे मुँज्याय् सेना समायोजनया बारे नं सहलह जूगु खः । निगू दलं सेना समायोजन विशेष समितियात सक्रिय दयेकाः याकनं शान्ति प्रक्रिया क्वचायेकेगु निर्णय याःगु दु ।
मुँज्याय् माओवादी नायः पुष्पकमल दाहाल 'प्रचण्ड', न्वकू नारायणकाजि श्रेष्ठ 'प्रकाश', मू छ्याञ्जे रामबहादुर थापा 'बादल', एमाले पाखें वार्ता पुचःया कजि माधवकुमार नेपाल लगायत पुचःया दुजःतय् ब्वति दुगु खः ।
