विद्रोह यायेत भारतलिसे वार्ता
येँ (सन्ध्या टाइम्स)/थौंकन्हय् भारत भ्रमणय् वनाच्वंपिं मधेसवादी दलया स्वम्ह नेतातय्सं भारतया नेतातलिसे आः मधेस विद्रोह गुगु कथं यायेगु धइगु विषयय् तीब्र रुपं सहलह ब्याकाच्वंगु खँ सीदुगु दु ।
बुधवाःनिसें भारत भ्रमणय् दुपिं मधेसी जनअधिकार फोरम लोकतान्त्रिकया अध्यक्ष विजयकुमार गच्छेदार, तराई मधेस लोकतान्त्रिक पार्टीया अध्यक्ष महन्थ ठाकुर व सद्भावनाया अध्यक्ष राजेन्द्र महतों भारतीय विदेशमन्त्री एसएम कृष्ण, अर्थमन्त्री प्रणव मुखर्जी, राष्ट्रवादी कांग्रेस पार्टीया अध्यक्ष शरद पवार, विपक्षी नेता भारतीय जनता पार्टीया लालकृष्ण आडवाणीयात नापलानाः सहलह ब्याकेधुंकूगु दु ।
इमिसं मधेस विद्रोहया योजनायात कयाः भारतीय प्रधानमन्त्री मनमोहन सिंह, कांग्रेस आईया अध्यक्ष सोनिया गान्धीलिसे तकं सहलह ब्याकूगु खँ धाःगु दु।
इमिसं म्हिगः हे तराई लागाय् च्वनाः सशस्त्र संघर्ष याना वयाच्वंगु थीथी पुचःया नेतातलिसे नं भारतय् च्वनाः वार्ता याःगु खँ सीदुगु दु ।
एकीकृत माओवादीया समर्थनय् एमाले अध्यक्ष झलनाथ खनाल प्रधानमन्त्री निर्वाचित जुइवं हे वर्तमान सरकारय् वने मखु धकाः घोषणा याःपिं थ्व स्वंगू मधेसवादी दलतय्सं मधेसय् विद्रोह यायेगु धकाः छुं दिं न्ह्यः तिनि घोषणा याःगु खः ।
थौंकन्हय् उगु स्वंगू दल दुथ्याःगु मोर्चाय् मधेसी जनअधिकार फोरम, तराई मधेस लोकतान्त्रिक पार्टी (नेपाल) व सद्भावना आनन्दीदेवी धाःसा दुथ्यानाच्वंगु मदु। थुपिं वर्तमान सरकारया समर्थक खः ।
