लः मदुगुलिं अय्लाः व बियरं छ्वाकाः होलि
येँ (सन्ध्या टाइम्स)/होलियात विकृतिपूर्ण रुपं हने मते धकाः न्ह्याक्व प्रचार याःसां थुगुसी न्हापा स्वयां नं विकृत जूगु खने दत।म्हिगः होलि पुन्हि कथं थीथी थासय् अय्लाः, बियर व कोकं लुकाः समेत होलि म्हितूगु खँ सीदुगु दु। छ्वाकेत लः मदयाः छुं मनूतय्सं अय्लाः व बियरं छ्वाकाः न्ह्यइपुकूगु खः। गनं गनं धाःसा अय्लाखं छ्वाकल धकाः ल्वापु समेत जूगु खँ नं सीदुगु दु ।
थ्वहे झ्वलय् तराई लागाय् थौं होलि नखः हनाच्वंगु दु। स्वनिगः नापं पहाडी लागाय् म्हिगः हे होलि हंगु खःसां तराईवासीतय्सं धाःसा पुन्हुया कन्हय् कुन्हु जक होलि न्यायेकीगु चलन दु। म्हिगः येँया बसन्तपुली क्वःथःगु चीर नं तिंख्यलय् यंकाः च्याकूगु खःसा उकिया खरानी थनया मारवाडीतय्सं स्टिलया थलय् तयाः ज्वना वंगु खः ।
