येँय् प्यदँ लिपा बुद्धया अस्थिधातु शोभायात्रा
२५५३ क्वःगु बुद्ध जयन्तीया लसताय् म्हिगः राजधानी येँय् बुद्धया पवित्र अस्थिधातु शोभायात्रा यानाः चाःहीकेगु ज्या जुल । स्वयम्भुया आनन्दकुटी विहारया गर्भय् तया तइगु थ्व अस्थि प्यदँय् छक्वः सर्वसाधारणया दर्शनया लागिं पिने हयाः चाःहीकीगु चलन दुसा थुगुसी प्यदँय् छक्वः वइगु पाः लाःगु खः ।
थनया बसन्तपूनिसें बग्गीइ तयाः उगु अस्थिधातुया यात्रा न्ह्याकूगु खः । यात्राय् द्वलंद्वः बौद्ध उपासकउपासिकापिं त्वाःत्वालं वःगु बाजं धुन्या आदिं ब्वति कया वःगु खः ।
अस्थितया शोभायात्रा न्ह्यः आनन्दकुटी विहारय् वृहत बौद्ध सभा जूगु खः । सभाय् गणतन्त्र नेपाःया न्हापांम्ह राष्ट्रपति डा. राम वरण यादव मू पाहां कथं झाइगु ग्वसाः दुगु खःसां देशय् ब्वलनाच्वंगु राजनीतिक कारणं यानाः वय्कः धाःसा मझाल । लिसें प्रधानमन्त्री पुष्पकमल दाहाल 'प्रचण्ड' नं म्हिगःया ज्याझ्वलय् मथ्यन । ज्याझ्वलय् श्रीलंकाया राजदूत नापं आपालं गण्यमान्यतय् उपस्थिति दुगु खः ।
अस्थिधातुया शोभायात्रा थःने क्वःनेया थीथी लागा चाःहिलाः नःघःया श्रीघः विहारय् थ्यंकाः समापन जूगु खः ।
