जापानं निर्यात याःगु सिमिइ विकिरण
तःभुखाय् व सुनामी लिपा जापानया परमाणु उर्जा केन्द्रय् विष्फोट जुयाः हानिकारिक विकिरण फैले जुयाच्वंगु इलय् जापानं निर्यात याःगु सिमिइ विकिरण लूगु दु ।
जापानं शुक्रवाः ताइवानय् निर्यात याःगु सिमिइ अज्याःगु विकिरण लूगु खँ ताइवानी अधिकारीतय्सं धाःगु दु । तर ताइवानी परमाणु उर्जा विकिरण अनुगमन परिषदं सिमिइ लूगु विकिरणया मात्रा तसकं म्हो जक जूगु धाःगु दु ।
आइतवाः लुइकूगु अज्याःगु विकिरण ताइवानं क्वःछिनातःगु विकिरणया मापदण्ड स्वयां म्हो जक जूगु व उकिं मावन स्वास्थ्यय् छुं हानि मयाइगु अधिकारीतय्सं धाःगु दु । मानव स्वास्थ्यय् हनि मयाइगु जूसां अधिकारीतय्सं अज्याःगु विकिरणयुक्त सिमि आः तक बजारय् मवंगु व बजारय् मछ्वेयगु धाःगु दु ।
थ्वस्वयां न्ह्यः शनिवाः जापानय् नं तुकं व दुरुइ विकिरण लुइकूगु खः । परमाणु उर्जा केन्द्र विष्फोट जूगु ३० किलोमिटर तापाःगु बुइं उत्पादन जूगु अज्याःगु खाद्य वस्तुइ लुइकूगु विकिरण नं तसकं म्हो मात्राया जक जूगु दावी जापानी अधिकारीतय्सं याःगु दु ।
