उद्दार यानाः टोकियो यंकूपिं नेपाःमिपिं अलपत्र
जापानया सुनामीग्रस्त फुकुशिमा लिसे सेन्दाईपाखें उद्दार यानाः टोकियो थ्यंकूपिं नेपाःमिपिं अलपत्र जूगु दु । टोकियोसं च्वंगु नेपाली दूतावास ओशामाय् चीकूगु व टोकियोसं नं विकिरणया ग्याःचिकु अप्वःगुलिं झन् समस्याय् लाःगु उमिगु नुगः खा दु । विकिरणया प्रभावपाखें ताःपाकेत आःतक्क गुइप्यम्ह नेपाःमिपिंत सेन्दाई व फुकुशिमापाखें उद्दार यानाः टोकियो थ्यंकूगु दु ।
उद्दार याःपिंत छगू सरकारी भवनय् तयातःगु दुसा सितारा रेष्टुरेन्टय् नयेगु व्यवस्था मिलय् यानातःगु दु । थ्वहे दथुइ झिंस्वम्ह नेपाःमिपिंत उद्दार यानाः टोकियो हःगु कन्हय् खुन्हु जापानया सुनामीग्रस्त फुकुशिमापाखें न्हय्म्ह नेपाःमि स्वापुतिइ वःगु दु । विकिरणया मात्रा अप्वयाः वंगुलिं पिने पिहां वनेफूगु व जनजीवन कष्टकर जूगु जानकारी ब्यूसें उमिसं थःपिनिगु याकनं उद्दार यायेत माग याःगु दु । थ्व स्वयाः न्ह्यः बिहीवाः उद्दार उपसमितिं उगु थासं झिंस्वम्ह नेपाःमिपिंत उद्दार याःगु खः ।
