निगम व्यवस्थापनपाखें विशेष अदालतया निर्देशन अवज्ञा
फ्रान्सेली जहाज निर्माता कम्पनी एयरबसपाखें बैना धेबा लिहांवःगु सम्बन्धय् याकनं जानकारी बिइत विशेष अदालतं ब्यूगु उजं नेपाल वायु सेवा निगमया व्यवस्थापनं अवज्ञा याःगु दु ।
नीप्यघौ दुने जानकारी बिइत विशेष अदालतं ब्यूगु उजं पीच्याघौ बिइधुंका: नं निगमया व्यवस्थापनं उकि छुं च्युता: त:गु खनेमदु । स्ववाः न्ह्यः एयरबसपाखें बैना धेबा लिहांवःगु बुखँ सार्वजनिक जूसां नं आधिकारीक पुष्टि मजुइवं विशेष अदालतं बुधवा: स्पष्ट जानकारी बिइत निगम व्यवस्थापनयात उजं ब्यूगु खः । एयरबसं बैना रकम लित छ्वयाः हयेधुंकूगु दु ।
लिहां हे मवइकथं एयरबसयात बैना धेबा छ्वयाः भ्रष्टाचार याःगु धकाः अख्तियार दुरुपयोग अनुसन्धान आयोगं निगमया तत्कालीन कार्यकारी नायः सुगतरत्न कंसाकारलिसे खुम्ह उच्च अधिकारीतविरुद्ध विशेष अदालतय् मुद्दा दायर याःगु खः ।
अदालतय् बहसलिपा कंसाकारलिसे फुक्कसित धरौटीइ पिहांवयेधुंकूगु दु । एयरबसपाखें बैना धेबा लिहांवःगु आधिकारिक पुष्टि जूसा कंसाकारविरुद्ध मुद्दाया पेशी नापं वनीगु व धेबा लिहां मवइकथं बैना छ्वःगु प्रमाणित यायेत नापं थाकुइगु जूगुलिं निगमया महाप्रबन्धक केबी लिम्बुं चायेक चायेकं विशेष अदालतया उजंया अवज्ञा यानाच्वंगु दावी कर्मचारीतय्सं यानाँच्वंगु दु ।
