प्रचण्ड स्वेदश लिहांवल
एकीकृत नेकपा (माओवादी)या नायः पुष्पकमल दाहाल 'प्रचण्डं' चैत १५ गते तक्कया दुने संविधान च्वयेगुलिइ खनेदुगु कचवंबारे महत्वपूर्ण निर्णय जुइगु विश्वास प्वंकादीगु दु । वय्कलं संवैधानिक समितिसं निस्वंगु विवाद समाधान उपसमितिं क्वःछिनात:गु ईया दुने हे राज्यया शासकीय स्वरुप, राज्य पुनःसंरचना व निर्वाचन प्रणालीबारे क्वःछीगु विश्वास प्वंकादिल ।
सिंगापुरया स्वन्हुया भ्रमण पूवंकाः थौं नेपाः लिहांझायादीम्ह नायः प्रचण्डं त्रिभुवन अन्तर्राष्ट्रिय विमानस्थलय् सञ्चारकःमिपिंलिसे खँल्हाबल्हा यानादिसें संविधान च्वयेगु ज्या सकारात्मक दिशाय् न्ह्यःने न्ह्यानाच्वंगु जानकारी बियादिल ।
उगु इलय् वय्कलं मेमेगु दलतलिसे सहलह यानाः सरकारयात याकनं हे पूर्णता बिइगु नं धयादिल । नायः प्रचण्डयात लसकुस यायेगु नितिं उपप्रधानमन्त्री लिसे माओवादीया विदेश विभाग प्रमुख कृष्णबहादुर महरा विमानस्थल थ्यंकादीगु खः ।
एशिया प्यासेफिक फाउन्डेशनं ग्वसाः ग्वःगु अन्तरक्रियाय् ब्वति कायेगु नितिं प्रचण्ड वंगु बुधवाः सिंगापुर झायादीगु खः ।
