प्रधानमन्त्री निवासं फोन याना: सर्वसाधारणयात स्यायेगु ख्याच्वः
प्रधानमन्त्री झलनाथ खनालया सरकारी निवास बालुवाटारपाखें टेलिफोन यानाः सर्वसाधारणयात स्यायेगु ख्याच्वः ब्यूम्ह प्रहरी अधिकृत जूगु सीदुगु दु । प्रहरी नायब उपरीक्षक सइ प्रकाश मल्लं प्रधानमन्त्री ज्याकूया फोन दुरुपयोग यानाः थःथितिपिंत स्यायेगु ख्याच्वः ब्यूगु पुष्टि जूगु दु ।
श्रोतयाकथं मल्लयात कारबाही कथं प्रधानमन्त्री निवास बालुवाटारपाखें प्रहरी मू ज्याकू नक्साल सरुवा याःगु दु । सई मल्लं प्रधानमन्त्री निवासया फोन ल्याः ४४२४९०४ पाखें कञ्चनपुरया नारायण चन्दयात फोन यानाः स्यायेगु ख्याच्वः ब्यूगु बुखँ छुं दिं न्ह्यः सञ्चार माध्यमय् वःगु खः ।
मल्लया ख्याच्वःलिपा पीडिततय्सं प्रधानमन्त्री ज्याकू व एमाले राज्य व्यवस्था विभागय् निवेदन बियाः थःगु ज्यान सुरक्षाया माग गयाःगु खः । प्रधानमन्त्री ज्याकुथिं उगु घटनाया छानबिन याना: सई मल्लं फोनय् ख्याच्वः ब्यूगु खँ लुइकूगु खः ।
सई मल्ल पीडित नारायण चन्दया कलाःया पाजु खलः खः । प्रधानमन्त्रीया प्रेस सल्लाहकार सूर्य थापां सई मल्लं हे चन्दयात ख्याच्वः ब्यूगु पुष्टि यानाः थ्व उमिगु घरायसी ल्वापु जूगु जानकारी ब्यूगु खः ।
