जापानं नेपाःया उद्दारकःमिपिं अस्वीकार
भुखाय् लिपा वःगु सुनामीया हुनिं प्रभावित जूगु जापानी जनतायात उद्दार यायेगु निंतिं नेपाल सरकारं छ्वयेगु धयातःपिं झिंन्याम्ह उद्दारकःमि व राहत कथं यंकेत्यंगु न्याद्वः थान कम्बल जापान सरकारं अझ नं स्वीकार याःगु मदुनि । वंगु बुधबाः रक्षामन्त्री बिष्णु पौडेलं उद्दार पुचःयात नापलानाः देय्या शीर थकयाः वयेत उजं ब्यूसां नं जापान वनेगु तयारीइ दुपिं झिंन्याम्ह नेपाःमि सुरक्षाकःमिपिं अझ नं येँय् हे दु ।
जापानं नेपाःया ग्वाहालि स्वीकार मयाःगु हुनिं उपिं सुरक्षाकःमिपिं जापान वनेमखंगु खः । परराष्ट्र मन्त्रालयया प्रवक्ता रुद्र नेपालया कथं बिदेशी उद्दारकःमिया निंतिं बिशेष संयन्त्र दयेकेमाःगु जानकारी ब्यूसें तत्काल उद्दारकःमि मछ्वयेत जापानं इनाप यायेधुंकाः उमित येँय् स्टान्ड बाई तयातःगु दु ।
उखे जापानय् धाःसा आःतक्क च्यय्च्यागू देय्या उद्दारकःमिपिं थ्यंकाः जापानी लिसे बिदेशी नागरिकया उद्दार यानाच्वंगु दु । च्यय्च्यागू देय्या उद्दारकःमि थ्यंनेधुंकाः नं जापानं नेपाःमि उद्दारकःमि अस्वीकार यायेगुयात अर्थपूर्ण कथं काःगु दु ।
