मधेसवादीतय् ख्याच्वलं स्वंगू दल लुत्रुक्क
येँ (सन्ध्या टाइम्स)/संविधानसभाया राज्य पुनर्संरचना समितिं तयार यानातःगु थःपिनि प्रतिवेदन संवैधानिक समितिइ छ्वयेगु ज्या मधेसवादी दलतय्सं बिउगु कडा ख्याच्वःया कारणं जक सम्भव जूगु खँ सीदुगु दु ।
माओवादी, कांग्रेस व एमाले थेंज्याःगु तःधंगु पार्टीतय्सं राज्य पुनर्संरचना समितिया प्रतिवेदन संवैधानिक समितिइ मछ्वसे राज्य पुनर्संरचना आयोग गठन यानाः जक थ्व सम्बन्धी निर्णय यायेगु धकाः बिचाः यानाच्वंगु खः। लिसें जेठ १४ गते संक्षिप्त संविधान जक जारी यायेगु धकाः नं उमिसं दुनें दुनें सहमति यानातःगु खः। तर मधेसवादी पार्टीतय्सं थ्व खँ सीकाः यदि थ्व प्रतिवेदन तुरुन्त संवैधानिक समितिइ मछ्वल धाःसा फुक्क हे मधेसवादी सभासद्तय्सं सामूहिक राजीनामा बियाः मधेसय् विद्रोह याः वनेत्यल धकाः ख्याच्वः बिउगु खः। अज्याःगु ख्याच्वः वयेवं तिनि तःधंगु स्वंगू दलं बाध्य जुयाः उगु प्रतिवेदनयात संवैधानिक समितिइ छ्वःगु खः। मधेसवादी दलतय्गु अज्याःगु ख्याच्वःया कारणं संक्षिप्त संविधान जारी यायेगु तःधंगु दलय् कुतः विफल जूगु खँ सूत्रं धाःगु दु ।
