नेपाःया संविधान बारे भारतीय संसदय् चर्चा
येँ (सन्ध्या टाइम्स)/यदि आः वइगु जेठ १४ गते तक नं न्हूगु संविधान जारी मजुल धाःसा छु यायेगु धकाः नेपालय् ला खास चर्चा जूगु मदुनि, तर भारतया संसदय् धाःसा थुकियात कयाः सः तयेगु शुरु नं जुइधुंकूगु दु ।
म्हीग च्वंगु भारतीय संसदया बैठकय् न्ववासें पुलांम्ह विदेशमन्त्री लिसें भाजपा सभासद् जसवंत सिंहं नेपालय् यदि मई महिनाया अन्त तक नं संविधान जारी मजुल धाःसा छु यायेगु धकाः भारतं सरकारं बिचाः मयाःगु द्वपं बियादिल। यदि अबलय् तक नं न्हूगु संविधान जारी मजुल धाःसा नेपाःया सत्ताय् माओवादी च्वं वइ धासें उकी भारत सरकारं ध्यान मतःगु खँ वय्कलं कनादिल ।
विकिलिक्सपाखें नकतिनि जारी याःगु भारतीय विदेश मन्त्रालय सम्बन्धी छगू गोप्य दस्तावेजयात कयाः न्ववायेगु झ्वलय् वय्कलं भारतीय विदेश नीतिया आलोचना यासें थ्व खँ धयादीगु खः। अथे हे मुलायम सिंह यादवं चीन व नेपाःया लँपु जुयाः नक्कली भारु भारतय् दुहां वयाच्वंगु द्वपं नं बियादिल ।
