'जुजुं बिउगु द्वपंयात हे सदर याना बिल
येँ (सन्ध्या टाइम्स)/ भ्रष्टाचार याःगु द्वपं पुष्टि जुइवं जेल सजायँ फयेत तयार जुयादीम्ह पुलांम्ह मन्त्री चिरंजीवी वाग्लें थःत जुजुं फँसे यायेत भ्रष्टाचारया मुद्दा तःगु खःसां आः सर्वोच्च अदालतं थौंया हिलावंगु परिस्थितिइ नं वहे द्वपंयात सही माने याःगु खँ धयादीगु दु। सर्वोच्चया फैसला वयेधुंकाः म्हिगः बीबीसीलिसे खँ ल्हासें वय्कलं थ्व बिचाः तयादीगु खः ।
वय्कःयात सर्वोच्चं ४ करोड स्वयां जरिवाना व दत्या कैदया सजाय न्यंकूगु खः। थःगु सम्पत्ति फुक्कं पानाः जूसां जरिवाना पुलेगु खँ धासें वय्कलं आः जेल सजाय नं स्वीकार यायेगु खँ धाःगु दु। वाग्लें थःके दुगु करोडौं दां थः काय व भौनं कमे यानातःगु खः धकाः बयान बिउसां उकिया स्पष्ट स्रोत धाःसा खुले याये मफु ।
