यलय् बुद्ध प्रतिमा देय्चाःहीकल
२५५३ क्वःगु बुद्ध जयन्तीया लसताय् म्हिगः थन भगवान बुद्धया प्रतिमायात बग्गीइ तयाः देय्चाःहीकल । टंगल टोल सुधार समितिया ग्वसालय् टंगः त्वालं शुरु जूगु उगु र् यालीइ आपालं मनूतय् सहभागिता दुगु खः । थनया त्वाःत्वालय् च्वंगु ज्ञानमाला खलः थीथी संघसंस्था त्वाःत्वालय् गठन यानातःगु मिसा पुचःतय्गु नं उकी सहभागिता दुगु खः । थीथी सांस्कृतिक झाँकी सहित पिहां वःगु उगु र् याली थीथी लागा चाःहिलाः टंगः त्वालय् तुं थ्यंकाः क्वचाःगु खः।
छवाःयंकं जूगु बुद्ध जयन्ती ज्याझ्वःया समापनया ज्याझ्वः थौं सनिलय् छगू समारोहया दथुइ जुइत्यंगु दु ।
ग्वसाः खलकं बिउगु जानकारी कथं आकिवं २५५४ क्वःगु बुद्ध जयन्ती समारोह वैशवर्ण महाविहार गुजिबहाःया ग्वसालय् न्यायेकीगु जूगु दु । गुजिबहालं २०४२ सालय् बुद्ध जयन्ती ज्याझ्वःया ग्वसाः ग्वःगु नीन्यादँय् क्यनीगु लसताय् आकिवं रजत जयन्तीया रुपय् झःझः धायेक ज्याझ्वः यायेत्यंगु खँ धाःगु दु ।
