माओवादीयात गृह बिइमफूसा राजीनामा : प्रधानमन्त्री
प्रधानमन्त्री झलनाथ खनालं न्ह्यगू बुँदे सहमति कथं एकीकृत नेकपा (माओवादी)यात गृह मन्त्रालय बीमफुसा थ:म्हं पदपाखें राजीनामा बिइगु घोषणा यानादीगु दु । वय्कलं सहमति कथं माओवादीयात गृह मन्त्रालय बिइमफुसा थःत प्रधानमन्त्रीया पदय् च्वनाच्वनेगु नैतिकतां मबीगु धयादीगु दु ।
थौं च्वंगु एमाले स्थायी समिति बैठकय् प्रधानमन्त्री खनालं थःगु बचं पूवंकेगु नितिं पार्टी नेतातय्त ग्वाहालि निंतिं इनाप नापं यानादीगु छम्ह नेतां जानकारी ब्यूगु दु । माधव नेपाल व केपी ओली पक्षया एमाले नेतातय्सं गृह मन्त्रालय माओवादीयात छु नं हालतय् बीमफइगु धयाः वयाच्वंगु दु । गृह मन्त्रालयया कचवंया हुनिं एमालें सरकारय् वनीपिं थः मन्त्रीपिनिगु नां नापं क्वःछीफूगु मदुनि ।
म्हिगः व थौं च्वंगु एमाले स्थायी समिति बैठक नं सरकारय् वनीगु मन्त्रीतय् नां क्वःछी मफुत । पार्टी मू ज्याकू बल्खुइ थौं सुथय् थ्यंमथ्यं स्वघौतक्क च्वंगु स्थायी समिति बैठकं मेमेगु दलतय्त सरकारय् ब्वति कायेत न्याम्ह दुजः दुगु वार्ता समिति निस्वंगु दु ।
पुलाम्ह प्रधानमन्त्री माधवकुमार नेपाल संयोजकत्वय् निस्वंगु वार्ता समितिइ न्वकुपिं वामदेव गौतम व अशोक राई, मू छ्याञ्जे ईश्वर पोख्रेल व स्थायी समिति दुजः केपी शर्मा ओली च्वनादीगु खः । बैठक लिपा छ्याञ्जे शंकर पोख्रेलं वार्ता पुचलं स्वन्हुदुने प्रगति विवरण लःल्हायेधुंकाः च्वनीगु स्थायी समिति बैठकं सरकारय् वनीपिं मन्त्रीपिनिगु नां ल्ययेगु जानकारी बियादीगु दु ।
