पेट्रोलियम पदार्थया भाः हानं थकायेगु निगम‌या ख्याच्वः

नेपाल आयल निगमं तत्काल सरकारं अनुदान मब्यूसाः हानं पेट्रोलियम पदार्थय् भाः थकायेगु ख्याच्वःगु ब्यूगु दु ।

रिपोटर्स क्लबय् बिहीवाः जूगु साक्षात्कार ज्याझ्वलय् निगमया कार्यकारी निर्देशक दिगम्बर झां निगम महिनाया १ अर्ब ५५ करोडया घाटाय् वनाच्वंगुलिं सरकारं तत्काल अनुदान बीमाःगु धयादिल ।

वय्कलं अन्तर्राष्ट्रिय बजारय् चिकंया भाः अप्वयाच्वंगुलिं नेपालय् नं भाः थकायेगु विकल्प मदुगु धयादिल । वय्कलं सरकारं अनुदान बीमाःगु वा करय् छुट बीमाःगु माग यानादिसें अथे मजूसाः मुल्या वृद्धि वा आपूर्ति असहज जुइफुगु धयादिल ।

लिप्पांगु इलय् हवाई ईन्धन व पेट्रोलय् भाः थकाःगु जूसां पेट्रोलय् अझ नं ४.३०/-, डिजेलय् २०/- व एलपी ग्याँसय् प्रति सिलिण्डर निसः व ५४ जुयाच्वंगु जानकारी नं वय्कलं बियादिल ।