थुगुसी सछिदँ लिपाया राष्ट्रिय जनगणना
येँ (सन्ध्या टाइम्स)/झिदँय् छक्वः काइगु राष्ट्रिय जनगणना थुगुसी आः वइगु असारंनिसें कायेत्यंगु दुसा उकिया लागिं केन्द्रीय तथ्यांक विभागं जोडतोडं ज्या यानाच्वंगु दु ।
थुगुसी काइगु जनगणना नेपाःया लागिं विशेष नं जुयाच्वंगु दु। छाय्धाःसां थुगुसी नेपालय् जनसंख्या कायेगु ज्या शुरु जूगु सछिदँय् क्यनाच्वंगु दु। उकिं वंगु सछिदँया दुने नेपाःया जनसंख्या गुलि अप्वल धकाः जक मखु नेपाली जनताया रहनसहन, आय आर्जन, सामाजिक जीवन थेंज्याःगु विषयय् गय् गथे हिउपाः वल धइगु खँ नं थुगुसी सी दयेकेगु तयारी जुयाच्वंगु दु ।
थनिं सछिदँ न्ह्यः न्हापांखुसी काःगु जनगणनाय् नेपाःया कुल जनसंख्या ४२ लाख दुगु खः। आः सछिदँ लिपा काइगु जनगणनाय् नेपाःया जनसंख्या २ करोड ८५ लाख थ्यनीगु अनुमान जुयाच्वंगु दु ।
थुगुसी नेपाली जनताया बसाइँ सराइँ यायेगु प्रवृत्ति गथे दु, पेशा, रहनसहनय् गज्याःगु हिउपाः वयाच्वन धइगु खँ समेत दुथ्याकाः करिब ५० गू न्ह्यसःया लिसः काइगु खँ सीदुगु दु ।
तथ्यांक विभागपाखें प्राप्त जानकारी कथं जनगणना कायेगु लागिं जेठया न्हापांगु वाःपाखेंनिसें हे ज्या शुरु याइ। तर जनगणना कायेगु ज्या धाःसा असार ३ निसें १३ गते तक जुइ। देय्या ७५ गुलिं जिल्लाय् थ्व झिन्हुया दुने जनगणना कायेगु ज्या सम्पन्न याइगु ग्वसाः दु ।
विभागया कथं गणना काये सिधःगुयां स्वलाया दुने प्रारम्भिक रिपोर्ट पिहां वइ। मेमेगु न्ह्यसःया लिसः समेत दुथ्याइ कथंया अन्तिम प्रतिवेदन वयेत धाःसा अझ छुं ई काइतिनिगु खँ धाःगु दु। थ्व जनगणना छगू कायेत राज्यं छगूत्या अर्ब दांया बजेट फ्याःगु दु ।
विभागं थौंकन्हय् न्ह्यसःपौ व मेमेगु सामग्री समेत तयाः तयार यानातःगु प्याकेज जिल्ला जिल्लाय् छ्वयेगु ज्या यानाच्वंगु दु। लिसें सामान ज्वनाः गणकत वनेगु ज्या नं जुयाच्वंगु दु ।
थ्वहे झ्वलय् मेखे जनगणनायात ध्यानय् तयाः थीथी जातीय, धार्मिक समुदायं थःपिनि तथ्यांक लाथेपाथे मवयेमा धकाः जनचेतना थनेगु अभियान नं न्ह्याकेगु शुरु यानाहःगु दु ।
