संवैधानिक अदालतप्रति न्यायाधीशत असन्तुष्ट

राजनीतिक दलतय्सं न्हूगु संविधानय् संवैधानिक अदालत तयेगु धकाः याःगु सहमति प्रति न्यायाधीशतय्सं असन्तुष्टि प्वंकूगु दु । प्रधानन्यायाधीश नापं न्यायाधीशतय्सं संवैधानिक अदालतं लोकतन्त्रयात कमजोर याइगु व न्यायापालिकाया स्वतन्त्रताय् न्ह्यः थनीगु तर्क यासें आपत्ति प्वंकूगु दु ।

प्रधानन्यायाधीश लगायत न्यायाधीशतय्सं संवैधानिक अदालतया खँय् टिप्पणी यायेत सुरु यायेवं संवैधानिक समिति अन्तर्गतया उपसमितिं थौं प्रधानन्यायाधीश रामप्रसाद श्रेष्ठ लगायत न्याम्ह न्यायाधीशतनाप उगु विषयलय् सहलह याःगु खः ।

सहलहसं न्यायाधीशतय्सं संवैधानिक अदालतया पलेसाः सर्वोच्च अदालतय् हे बेञ्च स्थापना यायेमाःगु सुझाव ब्यूगु खः । न्यायाधीशतनापया सहलह लिपा उपसमितिया कजि पुष्पकमल दाहाल 'प्रचण्डं' उपसमितिं याःगु निर्णयलय् थप सहलह यायेफइगु जानकारी बियादिल ।