उपसमितिया म्याद झिंन्यान्हु थप
येँ (सन्ध्या टाइम्स)/संविधान च्वयेगु झ्वलय् खने दुगु विवादित बुँदा ज्यंकेत ग्वाहालिया निंतिं गठन जूगु उपसमितिया म्याद झिंन्यान्हुया निंतिं थप याःगु दु। संवैधानिक समितिय थौं च्वंगु मुँज्यां उपसमितिं याःगु ज्या सन्तोषजनक जूगु निष्कर्ष पिकासें वइगु चैत्र १५ गते तकया निंतिं म्याद थप यायेगु निर्णय याःगु खः ।
संविधानय् खने दुगु विवाद ज्यंकेत वंगु फागुन १३ गते गठन याःगु उपसमितिया म्याद म्हिगः फागुन ३० गते तकया निंतिं बियातःगु खः। माओवादी अध्यक्ष प्रचण्डया संयोजकत्वय् गठन यानातःगु उपसमितिं विवादित न्हय्न्यागू बुँदात मध्ये स्वीच्यागू बुँदाय् सहमति कायम याःगु खःसा अझं स्वन्हय्गू बुँदाया विवादित विषयत ज्यंके ल्यं दनि ।
उपसमितिं याःगु ज्याय् सन्तोषजनक जूगु निष्कर्ष पिकाःगु समितिं आः थप जूगु इलय् हे दक्वं विवादयात ज्यंकीगु विश्वास यासें वइगु जेठ १४ गतेया दुने हे संविधान जारी याये फइगु नं दावी याःगु दु ।
उखे राजनीतिक दलया नेतातसें क्वःछीगु दिनय् संविधान पिहां वइमखु धकाः सार्वजनिक रुपं नवायेगु नापं संविधान जारी हे जुइ मफइगु अवस्थाय् गज्याःगु संविधानया खाका तयार जुइगु खँ धइगु नं धया हयाच्वंगु दु ।
देय्या न्हूगु संविधान जारी जुइत ७४ न्हु जक ल्यं दनिसा दलतय् दथुइ राज्यया शासकी स्वरुप, राज्यया पुनःसंरचना थेंज्याःगु महत्वपूर्ण विषयय् अझं सहमति जुइ फयाच्वंगु मदु ।
