मिं नयाः ध्वस्त जूगु द्यःया न्हूगु मूर्ति
येँ (सन्ध्या टाइम्स)/२०६७ या बैशाख ३ गते कुन्हु येँया इतुम्बाहाःस्थित ताहाननिइ छक्वलं न्याखा छेँ मिं नःबलय् भाजु रामकृष्ण महर्जनया छेँय् तयातःपिं थीथी ढलौटया द्यःपिं नं नाया वंगु खः। आः किलाघः त्वाः खलःया ग्वसालय् उगु द्यःपिं हानं दयेकाः पलिस्था नं याइगु जूगु दु। दँय्दसं पाहांचःर्हेबलय् जात्रा नापं यायेमाःपिं गणेद्यः व कुमारीया मूर्ति व तिसा दयेकाः थौं पलिस्था या:गु दु ।
यलया चक्रबहिली उगु द्यःपिं दयेकूगु खःसा म्हिगः किलाघः त्वाः खलःपाखें बाजं थानाः द्यः कयाहःगु खःसा म्हिगः हे द्यःयात न्यास तयेगु ज्या नं जूगु खः। थौं छगू धार्मिक ज्याझ्वः यासें द्यः पलिस्था याइगु ग्वसाः दुगु खँ खलःया नायः ई. मोहनकृष्ण डंगोलं कनादीगु दु। त्वाः खलःपाखें उगु द्यः दयेकादीपिं कलाकारपिंत नं हनेगु ज्या याःगु खः।
थ्व द्यःपिं पाहांचःर्हेबलय् जात्रा यायेमाःपिं जुयाः याकनं दयेकागु खँ नं वय्कलं कनादिल। आः थ्व द्यःपिं पाःपाःया छेँय् मतसे आखाछेँय् तयेगु निर्णय जूगु खँ नं वय्कलं कनादिल ।
उबलय् छेँ मिं नःबलय् थ्व द्यःत छुं हे ज्या लगे मजुइक क्षति जूगु खः। थ्व द्यः दयेकेत निगू लाख व नीद्वः तका खर्च तूगु खः। उकी ७५ द्वः येँ मनपापाखें व मेगु दां स्थानीय जनताया ग्वाहालिं चूलाःगु खः ।
उगु इलय् पाःताः जुइक मिं नःगु न्याखा छेँ नं आः दयेके सिधये धुंकूगु दु। छेँ धस्वाकेत पीडित परिवारयात मनपापाखें न्यागू लाख तका उपलब्ध याःगु खःसा स्थानीय जनता व नेवाः समुदायपाखें नं झिंन्यागू लाख तका आर्थिक ग्वाहालि वःगु खः ।
