हंगकंगया नेवाःपाखें जगतसुन्दरय् सिरपाः
येँ (सन्ध्या टाइम्स)/थ्वहे वंगु ११ मार्च कुन्हु हंगकंगया ओसुंग स्ट्रीट जोर्डनय् च्वंगु नेवार समाज हंगकंगया छगू मुँज्यां नेपालभाषाया माध्यमं आखः ब्वंकीगु जगतसुन्दर ब्वनेकुथिया विद्यार्थीतय्त सिरपाः बीगु निर्णय याःगु दु। समाजया प्रमुख सल्लाहकार अनाररत्न वज्राचार्यया उपस्थितिइ व समाजया अध्यक्ष माणिकलाल श्रेष्ठया अध्यक्षताय् च्वंगु उगु मुँज्यां जगतसुन्दर ब्वनेकुथिया उत्कृष्ट स्वम्ह विद्यार्थीतय्त ५०००।-, ३०००।- व २०००।- तका सिरपाः बीगु क्वःछिउगु खः ।
थ्व सिरपाःया निंतिं सल्लाहकार वज्राचार्यया संयोजकत्वय् ब्वनेकुथिया प्रिन्सिपल दुथ्याःगु छगू समिति दयेकाः माःगु खँ क्वःछी धाःगु दु। दँय् छक्वः बीगु थ्व सिरपाःया निंतिं समाजपाखें कोष स्थापनाया निंतिं हापं म्हय्गु निर्णय नं याःगु दु ।
थुगुसीया न्हापांगु सिरपाः बीत समाजया संरक्षक दुजः श्याम राज मानन्धरं हंगकंग डलर १२००।- आर्थिक ग्वाहालि यानादीगु दु ।
जगतसुन्दर ब्वनेकुथिपाखें थुगुसी स्वक्वःगुखुसी एसएलसी परीक्षाय् ब्वति कायेत्यंगु दु। थुकिया निंतिं ब्वनेकुथिपाखें एसएलसी बीपिं मस्तय्त विशेष कक्षा कयाच्वंगु खँ सीदुगु दु ।
