नेवाः संकिपा निर्माता निर्देशकतय् गुथि स्वन
येँ (सन्ध्या टाइम्स)/नेवाः संकिपाया प्रदर्शन व बजार अप्वयेकेगु तातुनाः संकिपा निर्माता निर्देशकतय् छगू कमिटी गठन जूगु दु। सुजाता एण्ड सुमि फिल्म प्रोडक्सनया निर्देशक सुरेन्द्र तुलाधरया संयोजकत्वय् 'नेवाः संकिपा गुथि' नांगु निर्माता निर्देशकतय् उगु संस्था नीस्वंगु खः ।
सानेपा दरवार ब्यांक्वीट पार्टी पालेसय् जूगु संकिपा निर्माता निर्देशकतय् छगू मुँज्यां नेवाः संकिपा गुथि नीस्वंगु खः। संकिपा गुथि दुने १७ गू नेवाः संकिपा निर्माण संस्था दुथ्याकाः २५ म्हेसिया संकिपा बजार व्यवस्थापन कमिटी दयेकूगु खः। सुजाता एण्ड सुमि फिल्म प्रोडक्सन, हेमा फिल्म्स प्रा.लि, पद्मावति मूभिज, एम्स् इन्टरटेनमेन्ट प्रा.लि., कला सन्देश मञ्च, विजेता फिल्म्स प्रा.लि., स्नेहा फिल्म्स प्रा.लि., त्रिजन मूभिज प्रोडक्शन, लुँमधि फिल्म प्रोडक्सन, सिमरन फिल्म्स, रेनिशा इन्टरटेनमेन्टस्, एसकेटि फिल्म्स, चिराग फिल्म्स प्रोडक्सन, मुभि स्टेशन प्रा.लि., जिनियश फिल्म्स प्रा.लि., तण्डुकार फिल्म्स प्रोडक्सन थुगु संस्थाय् दुथ्याःसा मेमेगु संकिपा निर्माण कम्पनी व निर्माता निर्देशकपिं नं थुकी दुहां वये ल्यं दनिगु खँ संयोजक तुलाधरं कनादीगु दु ।
ज्याझ्वलय् निर्माता निर्देशकपिं सुरेश बज्राचार्य, गुणराज शाक्य, स्वतन्त्र महर्जन, रवि डंगोल, बासु शाही, बिरेन्द्र ताम्राकार, राजेशमान सिंह, दिपक कपाली, सुरज श्रेष्ठ, आरएल महर्जन, तुल्सी डंगोल, अमृतचन्द्र श्रेष्ठ, सुशिल श्रेष्ठ, रुपिन डंगोल, हरिश तण्डुकारं वर्तमान संकिपाया बजाः व हलय् संकिपा प्रदर्शन गथे यानाः याये फइ धइगु विषयय् नुगःखँ प्वंकादीगु खः। नापं मुँज्यां छगू संस्थां संकिपा क्यनेज्या याइबलय् फुक्कं दुजः संस्थां ग्वाहालि यायेगु खँय् छगू मत जुयाः थवंथवय् ग्वाहालि याना वनेगु सहमति नं याःगु दु। गुथिपाखें नेवाः संकिपा निर्मातातय्त बल्लाकीगु बिचाः नं वय्कःपिंसं प्वंकूगु दु ।
