राज्य पुनःसंरचना समितिया प्रतिवेदन संवैधानिक समितिइ
न्हूगु संविधानय् गज्याःगु राज्य संरचनाया खाका दइगु धकाः संविधानसभाया राज्य पुनःसंरचना व राज्य शक्तिया बाँडफाँट समितिं तयार याःगु प्रतिवेदनय् थप सहलह व अन्तिम निर्णय यायेगु निंतिं संवैधानिक समितिइ छ्वइगु जूगु दु ।
संविधानसभाय् प्रतिनिधित्व याइगु नीच्यागू दलया थौं सिंहदरवारय् च्वंगु मुँज्यां राज्य पुनःसंरचनाया बारे निर्णय यायेगु निंतिं उगु प्रतिवेदन संवैधानिक समितिइ छ्वयेगु सहमति याःगु खः । आः संवैधानिक समितिं हे राज्य पुनःसंरचना यायेगु प्रतिवेदनय् हेरफेर वा संशोधन यायेत आयोग गठन यायेगु वा मयायेगु, विज्ञतय् सुझाव मुंकेगु ज्या याइ ।
राज्य पुनःसंरचना समितिं पहिचान व सामर्थ्यया आधारय् प्रस्ताव या:गु झिंप्यंगू प्रदेशय् नेपाली कांग्रेसं असहमति प्वंकेवं उगु प्रस्तावय् विवादय् लाःगु खः । विवादय् लानाच्वंगु प्रतिवेदन बारे थप निर्णय यायेत राज्य पुनःसंरचना आयोग गठन यायेमाःगु माग कांग्रेसं यानाच्वंगु खःसा एनेकपा (माओवादी) व मधेशवादी दलतय्सं आयोग गठन यायेगु मागया विरोध याना वयाच्वंगु दु ।
