उपसमितिया म्याद झिंन्यान्हुं थप
संवैधानिक समिति अन्तर्गत विवाद ज्यंकेत निस्वंगु उपसमितिया म्याद झिन्यान्हुं थप याःगु दु । संवैधानिक समितिया थौं च्वंगु मुँज्यां लिप्पांगु झिंन्यान्हु दुने उपसमितिं विवाद ज्यंकेत सन्तोषजनक ज्या याःगु धासें हानं झिन्यान्हुया म्यद थप यायेगु निर्णय याःगु खः ।
न्हूगु संविधान निर्माणय् खनेदुगु विवाद ज्यंकेत एनेकपा (माओवादी)या नायः पुष्पकमल दाहाल 'प्रचण्ड'या कजिःसुइ निस्वंगु उपसमितियात म्हिग तकया ई बियातःगु खः । उगु ईया दुने उपसमितिं ३८गू बुँदाय् सहमति याःगु खः ।
मुँज्याय् संवैधानिक समितिया सभापति निलाम्बर आचार्यं उपसमितिं विवाद ज्यंकेत याःगु प्रगति सन्तोषजनक जूगु धयादिसें थप याःगु झिंन्यान्हु दुने विवादित ३७गू बुँदाय् नं उपसमितिं सहमित याइगु विश्वास प्वंकादिल ।
न्हूगु संविधान निर्माणया झ्वलय् अझ नं राज्य पुनःसंरचना, शासकीय स्वरुप नापं निर्वाचन प्रणाली थज्याःगु महत्वपूर्ण बुँदाय् दलत दथुइ विवाद कायम दनी ।
