जापानी जनतायात उद्दार यायेत झिंन्याम्ह दुजः दुगु नेपाली पुचः जापान वनीगु
सरकारं तच्वःगु भुखाय् व सुनामी पीडित जापानी जनताया उद्दारया नितिं झिंन्याम्ह दुजः दुगु पुचः सेन्दाई छ्वइगु जूगु दु । थौं च्वंगु मन्त्रीपरिषद बैठकं नेपाःया मू ग्वाहालि दाता देय् जापानसं भुखाय् व सुनामीं जूगु क्षतिप्रति दुःख प्वंकुसें उद्दार पुचः छ्वयेगु निर्णय याःगु खः । पुचलय् झिम्ह नेपाली सेना, स्वम्ह सशस्त्र प्रहरी व निम्ह जनपद प्रहरी दइगु पर्यटनमन्त्री खड्कबहादुर विश्वकर्मां जानकारी बियादीगु खः ।
जापानी जनतायात वितरण यायेत न्याद्वः थान कम्बललिसे पुचः सेन्दाई वनेत्यंगु खः । प्रधानमन्त्री झलनाथ खनालं थौं हे नेपाःया नितिं जापानी राजदूत तात्सुओ मिजुनोलिसेया नापलाये ज्याय् जनधनया क्षतिप्रति नेपाल सरकार लिसे नेपाःमि जनतायापाखें सहानुभूति प्वंकूगु दु । थ्वहे दथुइ जापानसं च्वंगु नेपाली दूतावासं सुनामीग्रस्त सेन्दाईसं आःतक्क स्वापुतिइ वःपिं सच्छि व झिंन्याम्ह नेपाःमिपिनिगु धलः सार्बजनिक याःगु दु ।
