कारागार गोलीकाण्ड छानबिन यायेत उच्चस्तरीय आयोग निस्वन

सरकारं केन्द्रीय कारागार सुन्धारादुने हे सञ्चार उद्यमी युनुस अन्सारीयात गोलीं कयेकूगु घटनाया छानबिन यायेत उच्चस्तरीय आयोग निस्वंगु दु ।

थौं च्वंगु मन्त्रीपरिषद् बैठकं पुलांम्ह न्यायाधीश राजेन्द्र भण्डारीया कजित्वय् स्वम्ह दुजः दुगु आयोग निस्वंगु खः । आयोगय् नायव महान्यायाधीवक्ता प्रेमराज कार्की व डिआइजी कुबेरसिंह राणा दुजः जुयादीगु खः ।

आयोगयात सत्यतथ्य मालाः दोषीयात कारवाहीया नापं सिफारिस यानाः लच्छिया दुने प्रतिवेदन लःल्हायेत धयातःगु जानकारी पर्यटनमन्त्री खड्कबहादुर विश्वकर्मां बियादीगु दु ।

अथेहे बैठकं ल्यू छ्याञ्जे रुद्रकुमार श्रेष्ठयात छ्याञ्जेय् बढुवा यानाः महिला बालबालिका लिसे समाजकल्याण मन्त्रालयसं छ्वयेगु निर्णय नं याःगु दु ।