प्रतापपुर देगः बछि पियाः अध्ययन
येँ (सन्ध्या टाइम्स)/मलखं कयाः क्षतिग्रस्त जूगु स्वयम्भुया प्रतापपुर देगः पुनःनिर्माणया निंतिं प्रारम्भिक अध्ययन यायेत २० फीट तक देगः पीगु निर्णय जूकथं ज्या शुरु याःगु दु। देगः पीत थौं सोमवाः गजू लिकायेत्यंगु दु। सोमबाः हे पुरातत्व विभाग, स्वयम्भू महाचैत्य संरक्षण तथा व्यवस्थापन महासमिति व ठेकेदार पुचलं मुचुल्का यानाः महासमितियात गजूया जिम्मा बियाः ज्या न्ह्याकीगु खँ ठेकेदार रामगोपाल शिल्पकारं कनादिल। मू ठेकेदार छेँय् वनाच्वंगुलिं खः ग्वयेगु ज्या वय्कलं हे यानादीगु खः।
वंगु शनिवाःनिसें देगलय् पंया खः ग्वयेगु ज्या जूगु खः। देगः बछि जक पीत निवाः बीगु जानकारी बिसें वय्कलं ल्यं दनिगु ज्या अध्ययन धुंकाः जक न्ह्याकेगु खँ नं कनादिल ।
मलखं क्षति जूगु उगु देगः सम्भवतः क्वंनिसें हे पियाः हानं दयेकेमालीगु अनुमान वय्कलं यानादीगु दु। यदि देगः क्वंनिसें हे पी माल धाःसा ज्या पूवंक क्वचायेकेया निंतिं दछि बीगु वय्कःया धापू दु। उकिया लागिं बिस्कं हे सहलह यानाः बजेटया व्यवस्था यायेमालीगु खँ नं धाःगु दु ।
