बालं च्वनीपिंसं बेलुनं कयेकल धाःसा घरपतियात समेत ज्वनीगु
येँ (सन्ध्या टाइम्स)/थःगु छेँय् बालं तयातइगु दुसा होश यानादिसँ, गनं बालं च्वंपिंसं लँय् वःपिं मनूतय्त बेलुनं कयेकेगु ज्या जकं यानामच्वं ला? छाय्धाःसां आः प्रहरीं बालं च्वनीपिं मनूतय्सं सुयातं बेलुनं कयेकल वा रंग तः जुल धाःसा रंग तइम्ह जक मखु वयात बालं तयातःम्ह घरपतियात समेत ज्वना यंकीगु जूगु दु। स्वनिगलय् होलिया विकृति पनेत प्रहरीं आः थज्याःगु अभियान न्ह्याकूगु खः। सुं नं मनुखं थःत बेलुनं कयेकल वा रंग तल धकाः १०० नम्बरय् फोन यानाः उजुरी यात धाःसा तुरुन्त हे पुलिस थ्यंकः वइगु व्यवस्था नं याःगु दु ।
थ्व हे झ्वलय् प्रहरीं थुगुसी जक हे ३० म्ह स्वयां अप्वःसित ज्वनाः सार्वजनिक अपराध ऐन अन्तर्गत कारवाही यायेधुंकूगु दु। अथे हे लँय् वइपिं मनूतय्त सुं मस्तय्सं बेलुनं कयेकल धाःसा पुलिसं अज्याःपिं मस्तय् अभिभावकयात समेत कारवाही यायेगु खँ नं धाःगु दु ।
