पीगू बुँदाय् सहमति, लिपिवद्ध यानाः प्रतिवेदन तयार याइगु
येँ (सन्ध्या टाइम्स)/संवैधानिक समिति अन्तर्गत विवादित विषय ज्यंकेत थौं च्वंगु उपसमितिया बैठकं संविधान च्वयेगु झ्वलय् विवाद जुयाच्वंगु न्हय्न्यागू बुँदा मध्ये पीगु बुँदाय् सहमति कायम याःगु दु। सिंहदरवारय् च्वंगु थौं वैठकं आतक जूगु सहमतियात लिपिवद्ध यानाः प्रतिवेदन नं तयार यायेगु ज्या जूगु उपसमितिया दुजः लक्ष्मणलाल कर्णं धयादीगु दु ।
थौंतकया दुने सहमति जूगु बुँदायात लिपिबद्ध यानाः कन्हय् च्वनीगु संवैधानिक समितिया बैठकय् न्ह्यब्वयेगु नं वय्कलं जानकारी बियादीगु दु ।
उपसमितिं विवादित आपालं बुँदाय् सहमति कायम याःसां महत्वपूर्ण विषयत राज्य पुनःसंरचना, राज्यया शासकीय स्वरुप लगायतया विषयय् धाःसा अझं सहमति चूलाके फयाच्वंगु मदु। विवादित बुँदात मध्ये ल्यं दनिगु स्वीन्यागू बुँदात मध्ये नं नीगू बुँदाय् अःपुक व याकनं सहमति कायम जुइगु कथंया बुँदात लानाच्वंगु उपसमितिं जानकारी बिउगु दु ।
उखे विवादित बुँदाया ज्यंकेत गठन जूगु उपसमितिया म्याद थौं क्वचाःगु दुसा म्याद थप यायेगु वा मयायेगु धइगु निर्णय कन्हय् च्वनीगु संवैधानिक समितिय बैठकं याइ। संवैधानिक समितिं वंगु १३ गते उपसमिति गठन याःगु खःसां ज्या धाःसा १६ गते निसें जक शुरु याःगु खः। थ्व दथुइ उपसमितिया बैठक गुक्वः तक च्वंगु दु ।
उपसमितिया संयोजक जुयाच्वनादीम्ह माओवादी अध्यक्ष प्रचण्ड तःक्वः हे बैठकय् उपस्थित मजुइवं मुँज्या च्वंसां निष्कर्ष पिकायेत धाःसा थाकुयाच्वंगु दुजःतय् धापू दु ।
