सहिद गंगालालया जहान मंत
येँ (सन्ध्या टाइम्स)/अमर सहिद गंगालाल श्रेष्ठया जहान मय्जु हसिनादेवी श्रेष्ठ थौं वंगु चान्हय् मंत। वय्कः ९२ दँ दुम्ह खः ।
येँया काठमाडौं मोडल अस्पतालय् वासः याकुयाकुं वय्कः मदुगु खः। आकाझाकां मस्तिष्काघात जुयाः वय्कःयात मोडेल अस्पतालय् भर्ना याःगु खः। शुक्रवाः बहनी मस्तिष्काघात जुयाः बेहोस जुइवं अस्पतालय् हयागु खँ वय्कःया छेँजःपिंसं कनादीगु दु ।
थौं हे येँया शोभा भगवतिइ वय्कःया अन्त्येष्टि क्वचाल। वय्कःया याकःकाय शशिलाल श्रेष्ठं मि तयादीगु खः। खुसिइ प्रम झलनाथ खनाल नापं थीथी पार्टीया नेता कार्यकर्ता, कलाकार मदनकृष्ण श्रेष्ठ नं थ्यंगु खः। १९९७ सालय् शोभा भगवतिइ हे गंगालालयात गोलीं कयेकाः स्याःगु खः। गंगालाल मदुगु इलय् हसिनादेवी १९ दँ तिनि दुम्ह खः। उगु इलय् मचा बूगु ई जुयाः वय्कलं गंगालालयात अन्तिम इलय् तकं नापलाः वने मखंगु खः ।
