'बाम सहमतिइ कांग्रेसया पंग'
एकीकृत नेकपा (माओवादी)या नेतातय्सं जनतां ययेकूगु शान्ति व संविधानयात निष्कर्षय् थ्यंकेत नेपाःया राजनीतिक दलत छधी जुइगुया विकल्प मदुगु बिचा: प्वंकूगु दु । विदेशी प्रतिक्रियावादीतय्सं डलरया खेती यानाः नेपाःया राजनीतिक दलतय्त ल्वाकाः थःगु स्वार्थ पूवंके स्वंगुलिं उकियाप्रति सचेत जुइमाःगु उमिगु धापू दु ।
क्रान्तिकारी पत्रकार संघ खोटाङं थौं याःगु ज्याझ्वलय् बरिष्ठ न्वकु मोहन वैद्य 'किरणं' शान्ति व संविधानयात निष्कर्षय् थ्यंकेत माओवादी व एमालेदथुइ जूगु सहमतिइ नेपाली कांग्रेसं अवरोध याःगुप्रति च्यूताः प्वंकादिल । मुख्य दलतदथुइ सहमति जुइमफुसा शान्ति व संविधान निष्कर्षय् मथ्यनीगु धयादिसें वय्कलं राष्ट्रिय स्वाधिनता व देय्या समृद्धिया नितिं कांग्रेस नं सहमतिइ वयेमाःगु खँय् ब: बियादिल ।
थ्वहे दथुइ विराटनगर विमानस्थलय् थौं पत्रकारलिसे खँल्हानादिसें न्वकु डा. बाबुराम भट्टराईं नेपाली कांग्रेसलिसे मेगु सहमति यानाः जूसां नं थ्वहे सरकारयात राष्ट्रिय सहमतिया सरकार दयेकेगु धयादिल । वय्कलं आःया सरकारयात हे राष्ट्रिय सरकारया स्वरुप बिइगु कुतः जुयाच्वंगु तर कांग्रेसं मन्यंगु धयादिल ।
अथेहे क्रान्तिकारी पत्रकार संघ दाङं थौं हे घोराहीसं याःगु पत्रकार नापलाये ज्याय् माओवादीया मेम्ह न्वकु नारायणकाजी श्रेष्ठ 'प्रकाशं जनताया म्याण्डेटयात पूवंकेत दलत इमान्दार व एकताबद्ध जुइगुया विकल्प मदुगु धयादिल ।
दलतदथुइया सहमतिकथं सेना समायोजनया नितिं कार्ययोजनाया खाका न्यान्हुयादुने हे वइगु व संविधान जारी यायेगु स्वयाः न्ह्यः हे सेना समायोजन जुइधुंकीगु वय्कःया विश्वास दु । थुकथं हे माओवादीया मू छ्याञ्जे रामबहादुर थापा 'बादलं' फुक्क वामपन्थी, देय्भक्त व गणतन्त्रवादीत जनताया संघीय गणतन्त्रयात संस्थागत यायेत न्हूगु आधारय् एकताबद्ध जुइमाःगु धयादिल ।
येँ-चितवन गणतान्त्रिक मञ्चं थौं येँया महाराजगञ्जस्थित शंखपार्कय् याःगु राजनीतिक, बैचारिक गुँभ्वय् लिसे साँस्कृतिक ज्याझ्वलय् वय्कलं फुक्क छधी जूसा जक जनतां ययेकूगु आमूल हिउपाः, शान्ति व संविधान पूवंके फइगु बिचाः तयादिल ।
