'जेठ १४ गते न्ह्यः हे शान्ति प्रक्रिया क्वचाइ'

प्रधानमन्त्री झलनाथ खनालं संविधान निर्माण यायेगु लिप्पांगु न्हि जेठ १४ गते न्ह्यः हे शान्ति प्रक्रिया क्वचाइगु दावी यानादीगु दु ।

नेपाल पिस एण्ड सोलिडारिटीं ग्वसाःग्वःगु निन्हुन्यंकया दक्षिण एसियाली शान्ति सम्मेलनया शनिवाः येँय् उलेज्या यानादिसें प्रधानमन्त्री खनालं शान्ति प्रक्रियाय् प्रगति जुयाच्वंगु धयादिसें जेठ १४ गते दुने लडाकु पुनःस्थापना व व्यवस्थापन जुयाः शान्ति प्रक्रियां पूर्णता काइगु धयादिल ।

वय्कलं शान्ति पलिस्था मजुइकं विकास सम्भव मजूगु धयादिसें दक्वं मिलेजुयाः शान्ति पलिस्था यायेत कुतः यायेमाःगु धयादिल । वय्कलं शान्ति प्रक्रिया गुलि याकनं क्वचाइ उलि हे याकनं विकास जुयाः आर्थिक स्तर नं थहांवनीगु धयादिल ।