लाकौल सिरपाः लःल्हात
येँ (सन्ध्या टाइम्स)/नेपालभाषा साहित्य ख्यलय् बीगु दकलय् तःधंगु धनराशीया बैकुण्ठ लाकौल सिरपाः थौं जूगु छगू ज्याझ्वःया दथुइ साहित्यकार केशरलाल श्रेष्ठयात लःल्हाःगु दु ।
बैकुण्ठ लाकौल सिरपाः समितिया नायः प्रा.डा. सुन्दरकृष्ण जोशीया सभापतित्वय् जूगु ज्याझ्वलय् मूपाहां लुम्बिनी बौद्ध विश्वविद्यालयया उपकुलपति प्रा.डा. त्रिरत्न मानन्धरं नीद्वः तका दांया सिरपाः लःल्हानादीगु खः। नेवाः लोकबाखंयात राष्ट्रिय-अन्तर्राष्ट्रिय ख्यलय् न्यंकेगु व नेपालभाषा साहित्यया थीथी विधाय् च्वसा न्ह्याकाः थुकिया संरक्षणय् बियादीगु योगदानया कदर यासें वय्कःयात थुगु सिरपाः लःल्हाःगु खः ।
समितिया दुजः मय्जु प्रा. प्रेमशान्ति तुलाधरं लसकुस यानादीगु ज्याझ्वलय् मूपाहां मानन्धर, नायः जोशी, सिरपाःया संरक्षक श्रीकण्ठ लाकौल, इश्वरीमैंया श्रेष्ठपिंसं नं थःथःगु नुगः खँ प्वंकादीगु खः ।
