नेतातय्त जिम्मी कार्टरया फोन वल
येँ (सन्ध्या टाइम्स)/पुलांम्ह अमेरिकी राष्ट्रपति जिम्मी कार्टरं नेपाःया वर्तमान राजनीति प्रति चिउताः तसें नेपाःया फुक्क धइथें पार्टीया छम्ह छम्ह मू नेतायात फोना यानाः न्यनेकने यानादीगु दु। थ्व झ्वलय् थौं सुथय् नेकां सभापति सुशील कोइरालायात नं फोन यानाः खँ ल्हानादिल ।
खँल्हाबल्हाय् सभापति कोइरालां माओवादी व एमाले इमान्दार मजुल धकाः चिन्ता प्वंकुसें कार्टर समक्ष गुनासो यानादीगु खः ।
माओवादी व एमाले शान्ति व संविधानय् प्रतिबद्धता प्वंकूसां उकिया कार्यान्वयनय् लिबाकाच्वंगु खँ न्ह्यथँसें वय्कलं शान्ति व संविधानया नितिं माक्व ग्वहालि यायेत कांग्रेस सदां हे तयार दु धकाः नं धयादिल ।
कोइरालां कार्टरयात धयादिल, 'माओवादी व एमालें छता धाइगु अले ब्यवहारय् धाःसा मेता हे याइगु जुयाच्वंगु दु। इमिगु लिपांगु गतिविधिं यानाः शान्ति व संविधानप्रति उमिगु प्रतिबद्धताय् हे विश्वास याये मफइगु अवस्था जुयाच्वंगु मदु ।'
शान्ति व संविधानया निंतिं सत्तारुढ दल माओवादी व एमालेयात दवाव बीत नं कोइरालां कार्टरयात इनाप यानादीगु खः। लिसलय् भाजु कार्टरं नेपालय् स्थायी शान्ति ब्वलंकेमाःगु खँ न्ह्यथँसें उकिया लागिं सकलें हे जानाः न्ह्याः वनेत सुझाव बियादीगु खः ।
कार्टरं म्हिगः जक तिनि प्रधानमन्त्री झलनाथ खनाल माओवादी अध्यक्ष प्रचण्डयात फोन वार्ता यानाः नेपाःया शान्ति प्रक्रिया बारे चिउताः प्वंकादीगु खः। नेपाःया शान्ति प्रक्रियायात सफलत यायेत कार्टरं चायेकातःगु कार्टर फाउण्डेशनं नं ग्वाहालि याःगु खः ।
