प्रधानमन्त्री खनाल व माओवादी नायः प्रचण्ड दथुइ सहमति
प्रधानमन्त्री झलनाथ खनाल व एकीकृत नेकपा माओवादीया नायः पुष्पकमल दाहाल 'प्रचण्ड' दथुइ जनसेनाया समायोजन लिसे पुनःस्थापनाया नितिं माःगु जनशक्ति आपूर्ति यायेगु सहमति जूगु दु । प्रधानमन्त्री निवास बालुवाटारय् थौं जूगु नापलाये ज्याय् निम्ह शीर्ष नेतातदथुइ सेना समायोजनया खाका तयार यायेत कार्यदल दयेकेगु सहमति नं जूगु दु ।
नापलाये ज्याधुंकाः शान्ति लिसे पुनःनिर्माणमन्त्री वर्षमान पुन 'अनन्तं' विशेष समिति अन्तर्गतया सचिवालयं माग याःकथं जनशक्ति आपूर्ति यायेगु व छगू ब्यागलं कार्यदल दयेकाः न्यान्हुयादुने कार्ययोजना तयार यायेगु सहमति जूगु सञ्चारकर्मीपिंत जानकारी बियादिल । जनसेनाया शिविरय् माःगु जनशक्ति छ्वयेगु विषयलय् म्हिगः बहनी च्वंगु विशेष समितिया बैठकय् सहमति कायम जुइमफयेवं उकिया नितिं थौं निगू दल दथुइ कार्यदल दयेकाः क्वःछीगु सहमति जूगु खः ।
