भारतं अन्तर्राष्ट्रिय जैविक कानून मिचे यात : संसदीय समिति
संविधानसभा अन्तर्गतया प्राकृतिक स्रोत साधन समितिं नेपाःलिसे सीमा स्वानाच्वंगु जिल्लाय् छगू तर्फि गाः म्हुयाः भारतं अन्तर्राष्ट्रिय जैविक कानून मिचे याःगु दाबी याःगु दु । समितिं बर्दिया, कैलाली व कञ्चनपुरय् भारतं निर्माण याःगु ट्रेन्चया विषयलय् अध्ययन यानाः समिति दथुइ प्रतिवेदन लःल्हायेत गृह व बन मन्त्रालययात उजं नं ब्यूगु दु ।
प्राकृतिक स्रोत साधन समितिया थौं च्वंगु बैठकं भारतलिसे सीमा स्वानाच्वंगु पश्चिम तराईया छुं जिल्लाय् भारतं छगू तर्फी रुपय् गाः म्हुगुलिं च्यूताः प्वंकूसें उकिया अध्ययन यायेत निगू मन्त्रालययात उजं ब्यूगु खः । भारतं थःगु सुरक्षाया नितिं धासें क्यंगु उगु रबैयाया विषयलय् झिंन्यान्हुदुने अध्ययन प्रतिवेदन लःल्हायेत समितिं उजं ब्यूगु खः ।
भारतया उगु पलाखं नेपाःया सुरक्षाय् ग्याःचिकु पिदंगु व जैविक मार्गय् समस्या पिथंगु समितिया दाबी दु । लिसलिसे समितिया बैठकं सीमा क्षेत्रया नेपाःमिपिंत भारतीय जंगलय् आश्रति जुइगुपाखें गुकथं ताःपाकेगु धइगु विकल्प बिचाः यायेत नं बन लिसे भू-संरक्षण मन्त्रालययात उजं ब्यूगु खः ।
बैठकय् सभासद्तय्सं नेपाःया क्षेत्रदुने दुहां वयाः भारतं टे्रन्च म्हुगुलिं च्यूताः प्वंकूसें थ्व मुद्दायात अन्तर्राष्ट्रियकरण यायेमाःगु माग याःगु खः । बैठकय् ब्वति दुपिं गृह, बन मन्त्रालयया छ्याञ्जे व नेपाल प्रहरीया आइजीपी रमेशचन्द ठकुरीं भारतं याःगु उगु क्रियाकलापया विषयसं याकनं अध्ययन न्ह्याकिगु प्रतिबद्धता प्वंकादिल । भारतं थःगु सुरक्षाया नितिं धासें बर्दिया, कैलाली, कञ्चनपुर लगायतया जिल्लाया सीमानाय् टे्रन्च अर्थात गाः म्हुगु दु ।
