कारागारदुने गोली कयेकूम्ह जसजित सिंहयात झिंन्यान्हुया ई तन
सञ्चार उद्यमी युनुस अन्सारीयात केन्द्रीय कारागारदुने बिहीबाः गोली कयेकूम्ह भारतीय नागरिक जसजित सिंहयात प्रहरीं थौं अवैध ल्वाभः लिसे खरखजानाया मुद्दा तःगु दु । सिंहयात हत्याया कुतः याःगु द्वपं मब्यूसे प्रहरीं अवैध ल्वाभः क्वःब्यूगु धासें ल्वाभः लिसे खरखजाना ऐन अन्तर्गतया जक द्वपं ब्यूगु खः । प्रारम्भिक अनुसन्धानया नितिं जक थ्व द्वपं ब्यूगु व लिपा मुद्दा दर्ता यायेबलय् हत्याया कुतःया हे मुद्दा दायर याइगु प्रहरीं धाःगु दु ।
येँ जिल्ला अदालतपाखें अनुसन्धानया नितिं झिंन्यान्हुया ई कयाः प्रहरीं थप अनुसन्धान न्ह्याकूगु दु । अभियुक्त सिंहं छक्वःपतिकं बयान हिलेवं अनुसन्धानय् ज्यामछिंगु प्रहरीया धापू दु । सिंहं थःम्हं ल्वाभः मयंकाःगु जेलदुनेया प्रहरीं ल्वाभः ल्हातय् तयाः कयेकेत ब्यूगु धइगु बयान ब्यूगु अनुसन्धानय् दुगु उच्च स्रोतं धाःगु दु । वयाःगु वास्तविक नां जसजित सिंह खः वा मखु धइगुलिइ नं शंका दुगु प्रहरीं जानकारी ब्यूगु दु ।
थ्वहे दथुइ महानगरीय प्रहरी आयुक्त ज्याकुथिं केन्द्रीय कारागारया सुरक्षाय् वंम्ह न्यय्निम्ह कर्मचारीतय्त सरुवा याःगु दु । सरुवा जूपिं फुक्क कर्मचारी क्वय्या तहयाःपिं खः । थ्व स्वयाः न्ह्यः म्हिगः प्रहरीं स्वम्हसित निलम्बन नापं यायेधुंकूगु खः ।
