गृहमन्त्री नियुक्त यानाः शान्तिसुरक्षा कायम यायेत सभासद्पिनिगु माग
सभासद्तय्सं देय्या सुरक्षा व्यवस्था स्यनाः वनाच्वंगु सरकारया ध्यानाकर्षण याकूगु दु । उमिसं याकनं गृहमन्त्री नियुक्त यानाः शान्ति सुरक्षा कायम यायेत माग नं याःगु दु । व्यवस्थापिका संसद्या थौंया बैठकय् विशेष इलय् न्वंवानादिसें एकीकृत नेकपा माओवादीया अग्नी सापकोटां केन्द्रीय कारागारदुने हे जूगु गोलीकाण्डयात नेपालय् अन्तर्राष्ट्रिय अपराधिक गिरोहं कयेकूगु शृङ्खलाबद्ध क्रियाकलापया लिपांगु कडीया रुपय् कायेमाःगु धयादिल ।
वय्कलं नेपाःया सुरक्षा, राष्ट्रियता व अस्मितादथुइ जूगु थुगु कथंया प्रहार पनेत याकनं गृहमन्त्रीया नियुक्ति यानाः न्हूगु सुरक्षा रणनीति दयेकेत सरकारयात इनाप यानादिल । नेपाली कांग्रेसया पुष्पा भुषालं कारागारया कडा सुरक्षा घेरा त्वाःथलाः सञ्चार उद्यमी अन्सारी दथुइ जूगु आक्रमणं सरकारया सुरक्षा व्यवस्था कमजोर जूगु क्यंगुलिं उखेपाखे सरकार गम्भीर जुइत इनाप यानादिल । वय्कलं थुगु घटनाबारे सरकारया आधिकारिक धापू वयेमाःगु व गृहमन्त्रीया अबिलम्ब नियुक्ति जुइमाःगुपाखे ध्यानाकर्षण यानादिल ।
नेकपा एमालेया प्रदीप ज्ञवालीं अन्सारीदथुइ याःगु गोली प्रहारया घटनाबारे सरकारं सदनयात स्पष्ट विवरण बिइमाःगु माग यासें अन्तर्राष्ट्रिय अपराधिक गिरोह सक्रिय जूसा नेपाल असफल राष्ट्र जुइगु ख्याच्वः बियादिल । मधेशवादी दलया सभासद्तय्सं कारागारदुने हे गोली प्रहार जूगु, तराई/मधेशया सुरक्षा व्यवस्था तसकं कमजोर जूगु घटनापाखें प्रहरी प्रशासनया कमजोरी खनेदुगु बिचाः तसंे थुगु सम्बन्धय् प्रधानमन्त्रीं सदनयात सत्य तथ्य जानकारी याकेत माग याःगु खः । थ्व स्वयाः न्ह्यः शून्य इलय् न्वंवाःपिं सभासद्तय्सं नं देशय् हत्या, आतंक व असुरक्षा अप्वःगु धासें शान्ति सुव्यवस्था कायम यायेत सरकारया ध्यानाकर्षण याकूगु खः ।
