सहायक रथी बज्राचार्यया निदँ बढुवा रोक्का
सेनाया प्राविधिक सहायक रथी किरण बज्राचार्यया निदँ बढुवा रोक्का याःगु दु । थः स्वयां उच्च तहया अधिकृतय् पदावधी थपे मयायेत राजनीतिक लबिङ याःगु द्वपंलय् बज्राचार्यया निदँ बढुवा रोक्का याःगु खः ।
सैनिक जनसम्पर्क निर्देशनालयं बिहीवाः छगू विज्ञप्ति पिथना उगु प्रकरण छानबिन यायेत उपरथी अनिल जंग थापाया अध्यक्षताय् निस्वंगु समरी जनरल सैनिक अदालतं सैनिक ऐन २०६३या दफा १०९ बमोजिम बज्राचार्यया निदँ बढुवा रोक्का यायेगु फैसला याःगु खँ न्ह्यथनातःगु दु ।
अथेहे थीथी मुद्दाया अभियोग लाःपिं प्राविधिक प्रमुख सेनानी प्रमेन्द्र किशोर क्षेत्री, प्राविधिक सेनानी गोविन्द मैनाली, प्राविधिक सेनानी किरण श्रेष्ठ, व प्राविधिक सेनानी पंकज थापाया दत्याः बढुवा रोक्का याःगु दु ।
अथेहे प्राविधिक सेनानी ध्रुव पण्डितया दच्छिया बढुवा रोक्का याःगु दुसाः प्राविधिक सह सेनानी बिदुर चन्द्र श्रेष्ठ, प्राविधिक सह सेनानी राजेश कुमार देव व प्राविधिक सह सेनानी राम सागर यादवया न्याला बढुवा रोक्का याःगु दु ।
