संविधानया लिपांगु व्याख्या अदालतं यायेगु सहमति
दलत दथुइ संविधानया लिपांगु व्याख्या अदालतपाखें हे यायेगु सहमति जूगु दु ।
संवैधानिक समितिया विवाद समाधान यायेत निस्वंगु उपसमितिया थौं च्वंगु बैठकय् दलत दथुइ थज्याःगु सहमति या:गु खः । थ्व स्वयाः न्ह्यः संसदपाखें संविधानया लिपांगु व्याख्या यायेगु वा अदालतपाखें धइगुलिइ दलतदथुइ विवाद दुगु खः । संवैधानिक अदालत निस्वना संविधानया लिपांगु व्याख्या यायेगु वा सर्वोच्चय् ब्यागलं बेन्च पलिस्था यायेगु धइगुलिइ धाःसा दलत दथुइ सहमति जुइफूगु मदुनि ।
थुकियाबारे शुक्रवा:या बैठकं क्वःछीगु उपसमिति दुजः लिसे नेपाली कांग्रेस संसदीय दलया नेता रामचन्द्र पौडेलं जानकारी बियादिल । बैठकय् न्यायप्रणाली समितिया प्रतिवेदनय् नं सहलह जूगु खः ।
संविधान च्वयेगुलिइ विवादित न्हय्न्यागू बुँदा समाधान यायेत उपसमितियात फागुन मसान्ततक्कया ई ब्यूगु दु । न्हूगु संविधान पिथनेगु तिथि २०६८ जेठ १४ गते वयेत आः न्हय्गुन्हु जक ल्यं दनि ।
