फुक्क क्षेत्रय् राष्ट्रिय सहमति आवश्यक : प्रम खनाल
प्रधानमन्त्री झलनाथ खनालं फुक्क क्षेत्रय् राष्ट्रिय सहमति आवश्यक जूगु खँ धयादीगु दु । वय्कलं सहलह व वार्तापाखें फुक्क समस्या समाधान जुइगु धयादिसें शान्ति व संविधानया निंतिं दलत दथुइ राष्ट्रिय सहमति माःगु खँ न्ह्यथनादिल ।
थौं येँय् ग्वसाः ग्वःगु छगू ज्याझ्वलय् वय्कलं राष्ट्रिय सहमति बिना देय्या समस्या समाधान मजुइगु खँ लिसा कयादीगु ख:। उद्योगी व मजदुरत दथुइ तलब बृद्धिया विषययात कयाः पिज्वःगु विवादप्रति वय्कलं च्यूताः प्वंकादिसें श्रमिकतय्त उचित पारिश्रमिक दयेमाः धइगुलिइ थः सहमत दुसां नं संक्रमणकालीन अवस्थाय् बन्द व हड्ताल यायेमज्यूगु बिचाः प्वंकादिल ।
वय्कलं उद्योगी व मजदुरतय्त वार्ता व सहलहपाखें समाधान मालेत सुझाव नं बियादिल । आर्थिक क्रान्ति मजुयाः थ्व स्वयाः न्ह्यःया राजनीतिक हिउपाःयात रक्षा यायेमफूगु धयादिसें वय्कलं तःधंगु बलिदानपाखें प्राप्त जूगु उपलब्धीयात संस्थागत यायेत आर्थिक क्रान्ति जुइमाःगु खँय् ब: बियादिल ।
ज्याझ्वलय् अर्थमन्त्री भरतमोहन अधिकारीं सरकारं लोडसेडिङ अन्त्यया निंतिं याकनं हे न्हूगु योजना हयेत्यंगु जानकारी बियादिल ।
