५०न्हु दुने लडाकु समायोजन क्वचायेकेगु तयारी
प्रमुख स्वंगू दलं माओवादी जनसेनाया समायोजन लिसे पुनःस्थापनाया ज्या न्यय्न्हुया दुने क्वचायेकेगु तयारी या:गु दु । उकिया नितिं न्यान्हुया दुने यायेगु ज्याया 'मोडालिटी' लिसेया कार्यतालिका दयेकीगु जूगु दु । कार्यतालिका सेना समायोजन विशेष समितिं तयार याइ ।
सिंहदरबारय् थौं च्वंगु मुख्य स्वंगू दलया शीर्ष नेतातय्गु बैठकलिपा एमाले नेता प्रदीप ज्ञवालीं न्यय्न्हुया दुने हे 'मोडालिटी' लिसेया कार्यतालिका दयेकेगु सहमति जूगु जानकारी बियादिल । वय्कलं सेना समायोजन विशेष समितिं उकिया गृहकार्य न्ह्याकेधुंकूगु जानकारी नं बियादिल।
शान्ति मन्त्रालयसं थौं च्वंगु बैठकय् एकीकृत नेकपा (माओवादी), नेपाली कांग्रेस व नेकपा (एमाले)या शीर्ष नेतात व विशेष समितिया दुजःतय्गु नं ब्वति दुगु खः । स्वंगू दलया बैठकं सेना समायोजन विशेष समितिइ जनशक्ति नियुक्तिया निंतिं थौं हे ठोस निर्णय यायेत इनाप याःगु कांग्रेस नेता रामचन्द्र पौडेलं जानकारी बियादिल ।
विशेष समिति बैठक नं थौं हे च्वनेत्यंगु दु । जनसेना विशेष समिति मातहत वःसां नं सचिवालय व शिविर अनुगमनया निंतिं जनशक्ति मदु । बैठकय् स्वंगू दलत दथुइ याकनं जनसेना समायोजन व पुनःस्थापनाया ज्या क्वचायेकेगु निर्णय जूगु शान्ति लिसे पुनःनिर्माण मन्त्री वर्षमान पुनं 'अनन्तं' जानकारी बियादिल । वय्कलं सेना, सशस्त्र व जनपद प्रहरीइ जनसेना समायोजन यायेगु विषयलय् सहलह जूगु कनादिल ।
